Ansprache von Inge Gieppner-Carstensen, Tinnumer Biike 2019

Lef Sölring, lef Gasten, sa es dit sent fuulhönert Jaaren di 21. Febr. en uk 2019 sen wü altermaal töhopkemen, jir bi Tinem-Borig. Di Tinem-Borig es dach di Stair üp Söl, hur ual Aart en Brükdom altert lewet uuren es, en beeter Plaats jeft et ek üp Söl!. Di Sen fan Biiki heer ön di Loop fan die Jaaren skeft - jir uuk ek muar aur Rocht en Ünrocht urdiilet, diarfuar jeft et deling üder Stairer. Man dit Töhophualen, die Töhopstuunen ön gut en uk ön nuarig Tiren dit wiar, wat üs Fuarfaarn üs fuarlewet haa.

En wan üüs Töhopkumen jir bi dit Jöl diartö help ken, dat wü liir en se, dat dit Mearküder en Fuararküder ön des tiren nööriger - ünskeks fuul nööriger - üs wat wü teenk, da heer Biike uk deling en gurt en wichtig Bidüüting!

Di Tiren foranerie jam ünskeks en dit ek bluat tö di gut Sir.

Wü lefi muar en muar bi arküder forbi! Hur uur jit sa orcht gut Naiberskep leweit, sa dat di jen fuar di üder dair es? Jungen en uk Ualen laap üp Straat bi Naibers, bi Bikennten, bi Frinj forbi, aur ja bluat jit me jaar Handy snaki. Di Mensk uur gaar ek muar waarnomen. Hentö kumt, dat di Schiarnk twesk rik en arem langsen muar ütarküder lapt. Hat uur jir üp üüs Ailön biklaaget, dat dit ek noch Uuninger fuar Mensken jeft, diar jir lewi en aarberi. Man hur ünskeks fuul Uuninger, gurt Hüüsing stuun muar üs tiin Muun di Jaar lerig! Wat es di Grün? En hoken maaket wat diartöögen? Es di Politik ek aaft temelk reerluas - of uk machtluas? Ik teenk diarbi uk om di Denghoog. Wat uur diarfan? En hoken fan di Politik achterfraagit dit en sair wat diartö? Bit nü nemen!!

Wü lewi üp en Plat Öört, hur om gur lewi ken, wan om dit me di gurt Warel forgliket. Man dat dit sa bleft, diar mut wü - arkenjen fan üüs - höm Mait dö, fuar en gur Me-arküder en Fuar-Arküder tö sörigen. En - wat mesken dit swaarst es - diartö bidrai, dat üüs Sölring Aart en Wiis, üüs Brükdom, üüs Spraak ek forleesen gair. Aur dit es dit, wat üüs Ailon, wat Söl ütmaakit en hur altert mans üp wesen sen.

En diarfuar röp ik uk det Jaar diartö ap, wat ik 2018 uk al sair haa:

Let üüs üüs iinseet - arkenjen fan üüs - fuar en gur en stark Mearküder, Fuaraküder en Biarküder en dit me en "Rüm Hart en en klaar Kiming", dat üüs Aart en Wiis, üüs Brükdom en üüs Spraak bihölen bleft, dat wü üüs Identität biwaari!

Wan wü dit skafi- man arkenjen mut diartö bidrai - da ken wü hööpi, dat üüs Jungen en Jungensjungen ön leeter Jaaren uk jir bi dit Biikijöl sii en sjung ken:

Üüs Sölring Lön, Dü best üs helig,
Dü best üüs Ain, Dü best üüs Lek!!!